TreProX Erasmusverkefni – Íslandsheimsókn

Úr Bændablaðinu

Grein eftir Guðríði Helgadóttur


Vikuna 10.–16. október var haldið vikunámskeið á vegum Erasmus­verkefnisins TreProX. Það fjallar um viðargæði og staðla þar að lútandi, sem og aðferðir til að hámarka gæði timburs með viðeigandi aðgerðum á uppeldis­tíma skóga. Sam­starfs­aðilar í verkefninu eru Landbúnaðar­háskóli Íslands, Skógræktin, Trétækni­ráðgjöf, Kaupmanna­hafnarháskóli og Linne­háskóli í Svíþjóð.


Alls voru um 40 þátttakendur á námskeiðinu, frá Íslandi, Svíþjóð, Danmörku, Nýja-Sjálandi, Nepal og Kína. Dagskráin var fjölbreytt, fyrstu tvo dagana var dvalið í Borgarfirðinum, á Hvanneyri þar sem fram fóru fyrirlestrar og svo var farið í skoðunarferðir báða dagana, annars vegar í Skorradal og hins vegar í Norðtunguskóg. Á báðum stöðum tóku starfsmenn Skógræktarinnar á móti hópnum og fræddu þátttakendur um skógrækt viðkomandi svæða.


Á þriðja degi námskeiðsins færði hópurinn sig yfir á höfuðborgarsvæðið og hóf daginn á Mógilsá. Í fyrirlestrum þar var farið yfir stöðu íslenskrar skógræktar, sögulegar staðreyndir og helstu áskoranir fagsins í framtíðinni. Eftir fleiri fyrirlestra var haldið í Heiðmörk þar sem starfsmenn Skógræktarfélags Reykjavíkur tóku á móti hópnum og fóru með í skoðunarferð. Þá var haldið austur í Ölfus þar sem hópurinn gisti í framhaldinu.

Síðustu tvo dagana var röðin komin að námskeiði í viðskiptaflokkun á timbri. Bóklegi hlutinn fór fram á Reykjum í Ölfusi og verklegar æfingar á starfsstöð Skógræktarinnar i Þjórsárdal. Segja má að efni námskeiðsins hafa spannað skógrækt frá fræi til fjalar og nú, þegar íslenskir skógar eru margir hverjir fullsprottnir, er mikilvægt að byggja upp þekkingu í landinu á meðferð og framleiðsluferli viðar og annarra skógarafurða þannig að hægt sé að tryggja gæði og góða nýtingu á öllum stigum skógræktarinnar.


Námskeiðið var mjög vel heppnað og voru þátttakendur ákaflega ánægðir með heimsóknina til Íslands. Næstu námskeið í verkefninu verða í Svíþjóð í júní 2022 og Danmörku í september 2022.




Greinin úr Bændablaðinu.



https://www.bbl.is/frettir/fraedsluhornid/treprox-erasmusverkefni-%E2%80%93-islandsheimsokn?fbclid=IwAR3lqWi-GhTsk4LRfPAKrP-hJH1Z4ABwVNB1JscUzHOxFTe83UrFdZZMtCA