17. stjórnarfundur Skóg-BÍ    

FUNDARGERÐ búgreinardeildar skógarbænda í Bændasamtökum Íslands (Skóg-BÍ).

Stjórnarfundur á TEAMS fjarfundi, mánudaginn 16.janúar 2022 kl. 20:30

Fundarmenn:

Jóhann Gísli Jóhannsson, formaður (JGJ)                 

Sigrún Hrönn Þorsteinsdóttir, varaformaður (SHÞ)

Sighvatur Jón Þórarinsson, (SJÞ)

Guðmundur Sigurðsson, (GS)

Laufey Leifsdóttir, varamaður, (LL)

Hlynur Gauti Sigurðsson, starfsmaður BÍ/fundarritari  (HGS)

1)Í deiglunni

1. Tjörvi Bjarnason hjá Matfélaginu ehf. bað um að fá formlegt leyfi til að nota gögn um loftslagsmál sem skógarbændur hafa unnið gegnum tíðina, svo sem skýrslur, útreikningar og slíkt. Heimilda verður alltaf getið. Einnig er óskað eftir að eiga gott samstarf við SkógBÍ í framhaldinu.

Stjórn tók erindinu vel og gefur sína heimild.

1. Guðmundur Aðalsteinsson, skógarbóndi á Austurlandi, hefur átt í skoðanaskiptum við Skógræktina vegna greiðslna á girðingum, bæði uppsetta á samningsbundu landi og einnig óuppsetta á fyrirhuguðu skógræktarlandi, ósamningsbundnu. Skógræktin tók málið fyrir í síðustu viku og telst það afgreitt. 

Fundarmenn ræddu lauslega hugmyndir um hvernig væri hægt að aðstoða bændur í sömu stöðu og Guðmund. Skógræktin virðist stundum vera einráð í sinni stefnu gagnvart skógarbændum. Á það hvoru tveggja við um girðingar og taxta. Lagt er til að unnin verði tillaga í anda málsins fyrir búgreinaþing/búnaðarþing og beint til stjórnar BÍ.

2)Fulltrúar á búgreinaþing

Búgreinaþing verður á Hotel Natura í Reykjavík 22.-23. febrúar. HGS hefur farið yfir félagatal. Fjöldi félagsmanna í búgreinadeild skógarbænda var 182 um síðastliðin áramót. Einn virðist hafa hætt í deildinni á síðasta ári og tveir dáið. Fjöldi félaga í deildinni var 149 um áramótin þar síðustu og því aukning um 33 félaga eða 20% milli ára.

Fjöldi félaga eftir landshlutum:

Alls 182 félagsmenn í SkógBÍ: A= 47 (5 fulltrúar), N=58 (6), S=35 (4), V=36 (4), Vfj=6 (1) 

Næstu skref er að funda með formönnum skógarbændafélaganna ef þörf krefur og funda með grasrótinni eftir landsskipan skógarbændafélaganna á fjarfundi Teams.

Dagskrá

-Farið verður yfir hvað stendur til á búgreinarþinginu

-Kosnir verða fulltrúar á þingið af viðkomandi svæði

-Leggja má fram tillögur fyrir búgreinaþingið

-Önnur mál

Tímasetningar fundanna fimm eru þessar:

23. janúar (mán)    Austurland kl. 20:00    og    Suðurland kl. 21:00,

24. janúar (þri)       Norðurland kl. 20:00   og    Vesturland kl. 21:00,

25. janúar (mið)     Vestfirðir kl. 20:00 

Allir velkomnir en kosning er miðuð við landshluta.

3)Undirbúningur/hugmyndavinna búgreinaþings

Ýmislegt var rætt á fundinum varðandi aðdraganda þingsins. Hér er upptalning á því helsta:

• Hugmynd að tveimur meginumfjöllunarefnum fyrir þingið:

  • Sameining Skógræktarinnar og Landgræðslunnar

  • Stefnumörkun BÍ með áherslu á skóg og skjólbelti (sjá hugmyndir 16. stjórnarfundar)

• Greitt er fyrir flutning fulltrúa á þingið (hámarksgreiðsla miðast við flugfargjald).

• Hótelherbergi eru auglýst á afslætti fyrir félagsmenn BÍ.

• Er tími fyrir málþing eða fyrirlestra í lok þingsins?

• Endurskoða tillögur fyrra árs og gera skil.

• Búvörusamningar, kortlagning möguleika.

  • Hverjir eru kostir og gallar við að flytja verkefni frá ríkinu/Skógræktinni?

  • Hver verða áhrif af sameiningu Skógræktar og Landgræðslu fyrir skógarbændur?

  • Hvernig má útfæra stöðu kolefnisbindingar eldri skóga hjá skógarbændum?

Leggja þarf fram formaða tillögu til stjórnar BÍ á komandi búnaðarþing.

• Stefnumörkun BÍ, hvað geta skógarbændur lagt af mörkum til að efla landbúnað á Íslandi?

• Tillögur skulu berast með formlegum hætti (sbr. bondi.is) fyrir 1. febrúar (viðmið).

• Hver er staða Kolefnisbrúar, er vert að kynna hana?

• Huga þarf að fundarstjóra og fundaritara

• Huga þarf að aðalfundi LSE.

Fyrir jól var haldinn fundur með forystu BÍ og stjórn SkógBÍ. Þar lofuðu framkvæmdastjóri og aðstoðarframkvæmdastjóri að svara spurningalista frá félögum skógarbænda á landsvísu. Svör hafa ekki skilað sér. HGS falið að ýta á eftir þeim.

Næsti fundur er fyrirhugaður með formönnum skógarbændafélaga, ef þeir óska, 18. jan.

Fundi lauk kl 22:15

18. stjórnarfundur Skóg-BÍ    

FUNDARGERÐ búgreinardeildar skógarbænda í Bændasamtökum Íslands (Skóg-BÍ).

Stjórnarfundur á TEAMS fjarfundi, mánudaginn 6.febrúar 2022 kl. 12:00

Fundarmenn:

Jóhann Gísli Jóhannsson, formaður (JGJ)                 

Sigrún Hrönn Þorsteinsdóttir, varaformaður (SHÞ)

Guðmundur Sigurðsson, (GS)

Sighvatur Jón Þórarinsson, (SJÞ) á Teams

Hrönn Guðmundsdóttir (HG) á Teams

Hlynur Gauti Sigurðsson, starfsmaður BÍ og ritari (HGS)

1)Yfirlestur og samræming innsendra tillagna

Fyrir fundinn bárust tillögur frá skógarbændafélögum. Verkefni stjórnarinnar var að fara yfir tillögur, sameina þær sem eins voru, samræma, formgera og ákveða hvert skal beina þeim í kjölfarið.

Tillögur frá skógarbændafélögunum voru sem hér segir:

1/1      FSN        Skjólbelti

2/2      FSN        Skógarplöntuframleiðsla

3/3      FSN        Sameining Skógræktarinnar og Landgræðslunnar

4/4      FSN        Kolefnisbinding

5/5      FSN        Innflutningur viðarafurða

1/6      FSV        Framkvæmdaleyfi

2/7      FSV        Stýrð sauðfjárbeit

3/8      FSV        Endurmenntunarstyrkir til BÍ

4/9      FSV        Sameining Skógræktarinnar og Landgræðslunnar

5/10   FSV        Eign kolefniseininga

1/11   FSA        Kolefni viðurkennt sem skógarafurð

2/12   FSA        Endurgreiðsla virðisaukaskatts

3/13   FSA        Útdeiling fjármagns úr Rammasamningi um skógarafurðir

4/14   FSA        Kolefnisbinding eldri skóga

1/15   FSS         Sameining Skógræktarinnar og Landgræðslunnar

Tillögur inn á búgreinaþing eftir yfirlegu þessa fundar:

1. Skjólbeltagerð á bújörðum*

2. Sameining Skógræktarinnar og Landgræðslunnar

3. Skógarplöntuframleiðsla*

4. Kolefnisbinding*

5. Kolefni viðurkennt sem skógarafurð

6. Endurgreiðsla virðisaukaskatts

7. Innflutningur

8. Stýrð sauðfjárbeit

9. Rammasamningur*

10. Útlistun fjármagns úr rammasamningi

*Stjörnumerking þýðir að tillagan fékk umfjöllun á búgreinaþingi 2022 en hafa verið endurskoðaðar með nýjum áherslum. Í fyrra voru 14 tillögur sem fengu samþykki þingsins. Nokkuð er um endurtekningar milli ára. Sumar tillögur eiga enn við og enn er verið að vinna að þeim. Talið er því að óþarft sé að fjalla um þær aftur á komandi þingi. Tillögurnar sem átt er við eru: Þóknun stjórna búgreinadeilda BÍ, Horft fram á við, Kolefnisbrú, Félagsaðild að BÍ, Búvörusamningar, Framkvæmdaleyfi og Endurmenntun.

2)Formsatriði og dagskrá búgreinaþings

Dagskrádrög búgreinaþings skógarbænda

a) Ávarp skógaræktarstjóra

b) Skýrsla stjórnar.  

c) Samþykktir skógarbænda BÍ

d) Tillögur til umræðu og afgreiðslu

e) Kosning stjórnar skv. grein 7 í samþykktum þessum 

f) Kosning fulltrúa á Búnaðarþing

g) Starfsáætlun til næsta árs. 

h) Önnur mál. 

Aðalfundur Landssamtaka skógareigenda skal haldið að þingi loknu.

Tillaga að fundarstjórum: Agnes Geirdal og Guðbrandur Brynjúlfsson. HG og GS falið að leita til þeirra.

Fundarritarar: HG, SHÞ og HGS.

HGS falið að bjóða Þresti Eysteinssyni skógræktarstjóra, á búgreinaþingið.

Fyrirspurn til fjármálastjóra BÍ: Getur deild skógarbænda fengið útlistun á annars vegar streymi fjármuna úr annars vegar rammasamningi fyrir skógarafurðir og hins vegar útlistun félagsgjalda til deildar skógarbænda á síðasta ári.

Næsti fundur er fyrirhugaður í næstu viku.

Fundi lauk kl 16:45

​

​

19. stjórnarfundur Skóg-BÍ    

FUNDARGERÐ búgreinardeildar skógarbænda í Bændasamtökum Íslands (Skóg-BÍ).

Stjórnarfundur á TEAMS fjarfundi,  fimmtudaginn 16.febrúar 2022 kl. 20:00

Fundarmenn:

Jóhann Gísli Jóhannsson, formaður (JGJ)                 

Sigrún Hrönn Þorsteinsdóttir, varaformaður (SHÞ)

Guðmundur Sigurðsson, stjórnarmaður (GS)

Sighvatur Jón Þórarinsson, stjórnarmaður (SJÞ)

Björn Bjarndal Jónsson, varamaður (BBJ)

Laufey Leifsdóttir, varamaður (LL)

Hlynur Gauti Sigurðsson, starfsmaður BÍ og ritari (HGS)

1)     Tillögur rýndar

Gerðar voru minniháttar breytingar á tillögum fyrir búgreinaþingið næstkomandi miðvikudag.

2)     Fyrir búgreinaþing

-Þröstur Eysteinsson, skógræktarstjóri og Aðalsteinn Sigurgeirsson, fagmálastjóri Skógræktarinnar, hafa þegið boð á búgreinaþingið.

-Agnes Geirdal hefur tekið að sér að stýra þinginu. HGS verður í sambandi við hana.

-LL, HG og HGS taka að sér fundarritun. HGS hyggst setja upp eina upptökuvél til aðstoðar.

-Einn stjórnarmaður SkógBÍ hefur tilkynnt afsögn sína úr stjórn. Tveir hyggjast gefa kost á sér áfram en tveir eru enn óákveðnir. Ekki var tekin ákvörðun um hvort skipuð yrði uppstillingarnefnd.

-BBJ var boðið að kynna stefnumótun FSS á þinginu en það þótti ekki tímabært. BBJ segir að stefnan verði kynnt stjórnum skógarbændafélaganna og SkógBÍ þegar hún verður tilbúin, en það gæti verið á næstu vikum.

-HGS er beðinn að leita svara hjá framkvæmdastjóra BÍ og aðstoðarframkvæmdastjóra BÍ sem þau höfðu lofað að svara á sameiginlegum fundi BÍ og SkógBÍ sem haldinn var skömmu fyrir jól.

-Spurningarnar snerust í aðalatriðum um veru okkar innan BÍ og breytinguna frá því að vera í Landsamtökum Skógarbænda og að vera deild innan Bændasamtakanna.

3)     Ber

Hlynur segir frá fundi sínum við Elisabeth Bernard, starfsmanni Skógræktarfélags Íslands, þar sem hún hyggst sækja um styrk til að efla nýtingu á aukaafurðum úr skóginum, svo sem ber og sveppi. Stjórnarmenn vilja leggja umsókn hennar lið.

 Fundi lauk kl 21:50

​

FUNDARGERÐ búgreinardeildar skógarbænda í Bændasamtökum Íslands

20. stjórnarfundur Skóg-BÍ    

TEAMS fjarfundur,  fimmtudaginn 2. mars 2022 kl. 20:00

Fundarmenn:

Jóhann Gísli Jóhannsson, formaður (JGJ)                 

Hrönn Guðmundsdóttir, varaformaður (BBJ)

Guðmundur Sigurðsson, stjórnarmaður (GS)

Dagbjartur Bjarnason, nýr stjórnarmaður (DB)

Laufey Leifsdóttir, nýr stjórnarmaður (LL)

Hlynur Gauti Sigurðsson, starfsmaður BÍ og ritari (HGS)

Formaður opnaði fundinn og bauð nýja stjórnarmenn velkomna til starfa.

1)Varaformaður

Hrönn Guðmundsdóttir er nýr varaformaður búgreinadeildar skógarbænda.

GS tilnefndi HG, stjórnarmenn tóku undir tilnefningu og HG tók áskorunninni.

JGJ og HG verða búnaðarþingsfulltrúar deildar skógarbænda og GS er til vara.

2)Taxtanefnd

Sviðstjóri Skógræktarinnar hefur kallað eftir að stjórn Búgreinadeildar skógarbænda hjá BÍ (áður LSE) tilnefni fulltrúa í taxtanefnd. JGJ segir frá samtali sínu við Gunnar Þorgeirsson, formanns BBÍ, sem fram fór fyrr í dag. Rætt var um ábyrgðina sem fylgdi starfi nefndarinnar. Í meginatriðum gengur starf nefndarinnar út á að ákveða, og endurmeta eftir þörfum, laun sem landeigendur með skógræktarsamning við Skógræktina vinna eftir. Í nefndinni sitja fulltrúar Skógræktarinnar og skógarbænda. Lagt var til að skipa 3 fulltrúa frá hvorum hagsmunaaðilanum.

Fyrir fundinn hafði DB gefið kost á sér í nefndina. JGJ leggur til að auk DB sitji HG í nefndinni fyrir hönd stjórnar og GS sé til vara. Auk stjórnarmanna munu tveir starfsmenn BÍ taka sæti í nefndinni; þeir HGS og Örvar Þór Ólafsson, fjármálastjóri. LL telur sig vanhæfa til að sitja í nefndinni vegna tengsla. Stjórnin samþykkti tillögu JGJ.

Auk þess er lagt til að fyrsti fundur verði staðarfundur, t.d. á Mógilsá. Þar sem öllum stjórnarmönnum SkógBÍ gæfist kostur að taka þátt.

HGS var falið að hafa samráð við sviðstjóra Skógræktarinnar um tímasetningu fyrsta fundar taxtanefndar.

3)Tillögur af búgreinaþingi

Rennt yfir allar 10 tillögurnar sem voru samþykktar á nýafstöðnu búgreinarþingi. Oftast var þeim beint til eins aðila en í þremur tilfellum var þeim beint til tveggja aðila.

6 tillögum var beint til Búnaðarþings

3 tillögum var beint til stjórnar BÍ

2 tillögum var beint til matvælaráðherra

2 tillögum var beint til stjórnar SkógBÍ

Tillaga nr. 9. „Endurgreiðsla virðisaukaskatts“ var beint til stjórnar BÍ og fékk hún sérstaka umræðu. Lagt er til að hún verði unnin undir handleiðslu lögmanns BÍ, í samráði við deildina.

4)Frétt í næsta BBL

Fyrir fund hafði HGS skrifað grein sem yrði birt næsta Bændablaði. Titill greinarinnar var „Megináherslur skógarbænda og fjallaði um nokkur áherslumál af búgreinaþinginu“.

5)Fulltrúi á fagsvið Garðyrkjuskólans (FSU)

JGJ fól HGS að sitja í fagnefnd skógræktar fyrir hönd búgreinadeildar skógarbænda. HGS falið að tilkynna það til Guðríðar Helgadóttur, fagstjóra garðyrkjubrautar FSU. Jóhann Gísli var beðinn um að tilnefna nefndarmann í fagsvið skógræktar hjá FSU. Hlynur situr fyrir í þessari nefnd en ekki hefur verið mikið um verkefni síðustu fimm ár.

6)Skógarmatur

Umsóknin fyrir Skógarmat, verkefni Elisabeth Bernard hjá Skógræktarfélagi Íslands, var send 28. feb s.l. til Matvælasjóðs í flokki KELDA. Stuðningsyfirlýsing frá BÍ undirrituð af Vigdísi var send með umsókninni.

7)Önnur mál

Félagaöflun

DB leggur til að gerður verði bæklingur fyrir skógarbændur og verðandi félagsmenn BÍ. Bæklingurinn myndi svara svörum um ávinning aðildar að BÍ, fara yfir næstu skref, hvar nálgast má upplýsingar o.fl.  

För erlendis

Stjórn hefur áhuga á að skógarbændur undirbúi ferð, líkt og ferðina til Danmerkur 2021 á vegum LSE.

Málþing

Lagt er til að málþing skógarbænda verði haldið á Vesturlandi í haust, í samvinnu við skógarbændafélögin. GS vill skipa undirbúningshóp með FSV. Hugmynd að dagsetningu er í lok ágúst. Huga þarf að þema, fyrirlesurum og fleiru.

 Fundi lauk kl 21:21

FUNDARGERÐ búgreinardeildar skógarbænda í Bændasamtökum Íslands

21. stjórnarfundur Skóg-BÍ    

TEAMS fjarfundur,  fimmtudaginn 20. mars 2023 kl. 20:00

Fundarmenn:

Jóhann Gísli Jóhannsson, formaður (JGJ)                 

Hrönn Guðmundsdóttir, varaformaður (BBJ)

Guðmundur Sigurðsson, stjórnarmaður (GS)

Laufey Leifsdóttir, stjórnarmaður (LL)

Dagbjartur Bjarnason, stjórnarmaður (DB)

Birgir Steingrímsson, varamaður í stjórn (BS)

Bergþóra Jónsdóttir, formaður FSS (BJ)

Björn Bjarndal Jónsson, formaður FSS (BBJ)

Maríanna Jóhannsdóttir, formaður FSA (MJ)

Naomi Bos, formaður FSVfj. (NB)

Hlynur Gauti Sigurðsson, starfsmaður BÍ og ritari (HGS)

Formaður opnaði fundinn og bauð stjórnarliða SkógBÍ og formenn skógarbændafélaga velkomna.

1)Taxtar

Á samráðsfundi Skógræktarinnar og Landssamtaka skógareigenda (LSE) í nóvember 2019 var skipuð sex manna taxtanefnd til að fara yfir og mögulega endurskoða taxta hjá Skógræktinni. Sú nefnd fundaði aldrei enda hömluðu stjórnvöld fundahöld vegna Covid-faraldurs. Auk þess voru umbreytingar hjá LSE vegna sameiningar við BÍ. Á nýafstöðnu búgreinarþingi skógarbænda var nefndin endurskipuð og ætlað að hefja störf. Í síðustu viku átti nýskipuð taxtanefnd sinn fyrsta fund. Í nefndinni sitja: HG, formaður, DB og HGS fyrir SkógBÍ og fyrir Skógræktina sitja Hrefna Jóhannesdóttir, Hreinn Óskarsson og Gunnlaugur Guðjónsson. Auk þess sat Þröstur Eysteinsson skógræktarstjóri fundinn. Meginmál fundarins voru taxtar þessa árs. Fyrir fundinn hafði Skógræktin uppreiknað taxtana miðað við 60% launavísitölu og 40% neysluvísitölu eins og hún hefur gert síðustu ár. Þetta er í fyrsta skipti sem þessi blandaða leið Skógræktarinnar kemur skógarbændur betur heldur en ef um hreina hækkun eftir launavísitölu væri að ræða. Frá fyrstu samráðsfundum (2017) vildu LSE fulltrúar að hækkun taxta milli ára myndi eingöngu miðað við launavísitölu en það fékkst ekki samþykkt. Hefði tillaga LSE verið samþykkt strax í upphafi hefðu taxtar þó verið hærri en þeir eru núna, þrátt fyrir niðursveiflu síðasta ár.

Skógræktin hefur óskað eftir efnislegri umsögn um taxtana 2023 fyrir 27. mars nk. Samþykkt var að gefa fundarmönnum færi á að rýna gögn betur áður en umsögn yrði gerð. Athugasemdum yrði að skila til HGS sem fyrst. Tilgangur umsagnarinnar yrði þó ekki til að andmæla núverandi taxtahækkun þar sem skammt er til vorverka heldur frekar benda á þau atriði sem þyrfti að athuga í framhaldinu og er þar helst að nefna atriði í tengslum við: nýgirðingar, girðingaviðhald, áburðargjöf, áburðarkaup, íbætur, plöntuflutninga, umsjón, umhirðu, tvítoppaklippingu, gróðursetningaafköst og afköst í gróðursetningu við mismunandi aðstæður. Hvað afköst varðar var mikið rætt um að ekki megi horfa eingöngu til gríðarlega afkastamikilla verktaka sem vinna í góðu landi og eru mataðir á plöntum, allt upp í 7000 plöntur á dag en slík afköst voru nefnd á samráðsfundi með Skógræktinni í maí 2019.  Fundarmenn hafa ekki náð slíkum afköstum, og draga verulega í efa að þarna sé um dæmigerð afköst að ræða, en telja ekki óeðlilegt að miða við 1000-2000 plöntur á dag, en allt fari það eftir því hvort um sé að ræða íbætur eða ekki og svo má skoða hversu marga klukkutíma á dag eigi að planta. Taxtanefndarinnar bíður mikið verkefni.

2)Stýrð sauðfjárbeit

10. tillaga fundar búgreinadeildar skógarbænda af búgreinaþingi BÍ fjallar um lausagöngu búfjár og var henni beint inn á komandi búnaðarþing. Daginn fyrir búnaðarþing, eða 29. mars hafa formenn skógarbænda og sauðfjárbænda ákveðið að halda fund með stjórnum beggja búgreinadeilda til að ræða tillöguna. Ætlunin er að halda staðarfund en TEAMS er eflaust mögulegt fyrir þá sem það vilja.

3)Önnur mál

Málþing

HGS sagði frá umsókn sem hann er að skrifa til Landsvirkjunar um fjármögnun Málþings sem SkógBÍ ásamt skógarbændafélögunum ætla að halda í ágúst. HGS sagði frá dagskrárhugmyndum sínum og voru þær ræddar. Hann hafði skipt dagskránni upp í fjögur þemu:

1. Matar-skógrækt2. Byggðamáls-skógrækt3. Loftslags-skógrækt 4. Samkeppnishæf skógrækt

Fundurinn lagði upp að fyrst um sinni yrði lögð áhersla á nr. 1 og 3.

Skogarbondi.is

Heimasíða LSE er enn virk en tiltektar er þörf á henni. Formenn félaganna og HGS beðnir að líta yfir hana.

Framundan hjá FSS

BBJ segir frá viðburðum hjá FSS. Um helgina sóttu 40 manns viðburð þar sem Brynjar Skúlason fjallaði um kynbætur og BBJ fór yfir vorverkin í skóginum. Fleiri viðburðir eru á döfinni, svo sem skógargöngur og eru þeir auglýstir á skogarbondi.is.

Fagráðstefna skógræktar

Lítið hefur farið fyrir auglýsingum um Fagráðstefnu skógaræktar sem haldin verður á Ísafirði 29.-30. mars. HGS spurður hvort hann væri ekki í nefndinni. Hann svarar að svo sé en virkni hans þar innan hafi verið lítil og bendir á að búnaðarþing er haldið sömu daga.

Garðyrkjuskólinn FSU

HGS segir frá viðburði sem Garðyrkjuskólinn kom að í Laugardalshöll í síðustu viku þar sem grunnskólabörnum gafst kostur á að kynna sér nám mismunandi skóla. HGS hefur verið í virku sambandi að undanförnu við Björgvin Eggertsson, áfangastjóra Garðyrkjuskólans. Meðal námskeiða á næstunni er „Forvarnir gegn gróðureldum“ sem haldið er í byrjun apríl. Bundnar eru miklar vonir með framhaldið og eflda skógarkennslu innan FSU.

 Fundi lauk kl. 22:00

​

​

​

FUNDARGERÐ búgreinardeildar skógarbænda í Bændasamtökum Íslands

22. stjórnarfundur Skóg-BÍ    

TEAMS fjarfundur,  fimmtudaginn 17. apríl 2023 kl. 20:00

Fundarmenn:

Jóhann Gísli Jóhannsson, formaður (JGJ)                 

Guðmundur Sigurðsson, stjórnarmaður (GS)

Laufey Leifsdóttir, stjórnarmaður (LL)

Dagbjartur Bjarnason, stjórnarmaður (DB)

Björn Bjarndal Jónsson, formaður FsS, varamaður (BBJ)

Sigurkarl Stefánsson, formaður FsV, varamaður (SS)

Hlynur Gauti Sigurðsson, starfsmaður BÍ og ritari (HGS)

Formaður opnaði fundinn og bauð stjórnarliða SkógBÍ velkomna.

1)Afstaðið búnaðarþing

JGJ sagði frá því sem var efst á baugi, er varðar skógarbændur, á nýafstöðnu Búnaðarþingi.

1. Sauðskógar. Stjórnir búgreinadeilda sauðfjárbænda og skógarbænda funduðu daginn fyrir búnaðarþing og skiluðu inn sameiginlegri tillögu á þingið sem þar var samþykkt. Tillagan fólst í að sveitarfélög, hvert fyrir sig, færu yfir mál fjallskila og skyld mál heima í héraði.  

1. Búgreina- og búnaðarþing 2024. Stjórn BÍ var falið að reyna að sameina tvö stóru þing bænda, búgreinaþing og búnaðarþing, í eitt stórt veglegt þing þeirra í stað fyrir næsta ár.

1. Tryggingar. Sjóvá kynnti tryggingu sem BÍ hafa keypt fyrir sína félagsmenn. Hún kostar 16 þúsund á félagsmann og tryggir fjarvistir vegna t.d. veikinda upp á 380 þús. kr. á mánuði í 6 mánuði.

1. Hækkun félagsgjalda sem virkar þannig t.a.m. lægsta þrep hefur verið hækkað 100% eða úr 15 þús. kr. í 30 þús. kr. á ári, tekur gildi strax.  Meira varðandi félagsgjöld. JGJ sagði frá að eggjabóndi sem greiðir eftir veltu sinni 600 þús. kr. í félagsgjöld til BÍ á meðan annar bóndi, sem er með 70% hlutdeild í eggjamarkaði hérlendis, greiðir aðeins helmingi meira. Þarna þarf að gæta samræmis og stefnt er að því að taka upp annað fyrirkomulag á innheimtu félagsgjalda á næstu tveimur árum.

1. Afgreiddar tillögur á þinginu verða teknar saman og færðar í form Stefnumarka samtakanna. Stefnumótunin verður opinberuð innan fárra daga.

Um klukkustundarlangar umræður voru um lið D „Hækkun félagsgjalda“.

Stjórn SkógBÍ þykir hækkun félagsgjalda drjúg og telur að hún muni fæla skógarbændur frá því að ganga í Bændasamtökin. Auk þess getur hækkunin þýtt að núverandi félagsmenn, þeir sem eingöngu eru skógarbændur, hætti í samtökunum.

Rætt var um að BÍ þyrfti að taka fjárhagslega þátt í frekari vinnu við verkefni sem SkógBÍ á að sinna skv. rammasamningi, svo sem „Horft fram á meiri við“, jólatré, staðla, félagsmál og fyrirhugað málþing. HGS í samvinnu við stjórn BÍ, var falið að gera drög að fjárhagsáætlun verkefnanna.

2)FSC -upprunavottun

HGS segir frá starfi sem hann og Eiríkur Þorsteinsson hafa unnið að síðustu vikur. Það gengur út á að meta hvort tímabært sé að innleiða upprunastaðal FSC til Íslands og hvernig væri best að standa að því.

3)Kolefnisbrú

HGS segir frá því sem drifið hefur á dagana í starfi tengdu Kolefnisbrúnni síðustu daga og vikur.

4)Stjórnarmaður í Kolefnisbrúnni

Stjórnarliði LSE í Kolefnisbrú hefur óskað eftir að stíga til hliðar í stjórn og gefa sætið laust til að jafna kynjahlutfall stjórnarinnar. Stjórninni þykir Sighvatur sína mikið örlæti og sýnir því skilning upp að því marki að hann fær að stíga til hliðar á næsta aðalfundi Kolefnisbrúar.

5)Málþing skógarbænda

GS, SS og HGS segja frá undirbúningi við fyrirhugað málþing skógabænda.

• Varmaland Borgarfirði 13., 14. og15. október 2023.

• Á hótelinu er er 40 manna salur en fundarsalurinn „Þinghamar“ er skammt frá og tekur fleiri í sæti.

• Verðhugmynd er ekki komin en það verður tilkynnt innan tíðar.

• FSV munu taka að sér skipulag fyrir árshátíð og slíkt en SkógBÍ sér um málþingið.

• Styrkumsókn var send til Landsvirkjunar, viðbragða beðið.

• Tilkynna þarf fyrirhugað málþing og árshátíð á aðalfundum skógarbændafélaga.

• Á síðasta stjórnarfundi voru ýmis þemu rædd. Rætt var um að hafa dagskránna vel skipulagða og spennandi.

• Félagsmálum innan BÍ þyrfti að gera skil á þinginu og skal óskað eftir nærveru fyrirmenna BÍ.

• Mikilvægt að farið verði í skógargöngu á milli málþings og árshátíðar.

6)Aðalfundir skógarbændafélaganna

Gróskulegt starf skógarbændafélaganna verður í sumar og eru viðburðir auglýstir á skogarbondi.is

Næstu dagsettu aðalfundir eru: FSA 27. apríl, FSS 29. apríl, FSN 2. júní og FSVfj ? FSV var 23. mars sl..

Næsti fundur er fyrirhugaður staðarfundur 8. júní 2023 og verður fulltrúum BÍ

og formönnum skógarbændafélaga boðið að mæta á fundinn.

 Fundi lauk kl. 21:50

​

​

FUNDARGERÐ búgreinardeildar skógarbænda í Bændasamtökum Íslands

23. stjórnarfundur skógardeildar BÍ    

Staðarfundur, fundarherbergið Fjósið í Borgartúni 25 -BÍ,  

fimmtudaginn 8. júní 2023 kl. 11:10

Fundarmenn:

Jóhann Gísli Jóhannsson, formaður (JGJ)  

Hrönn Guðmundsdóttir, varaformaður (HG)               

Guðmundur Sigurðsson, stjórnarmaður (GS)

Dagbjartur Bjarnason, stjórnarmaður (DB)

Laufey Leifsdóttir, stjórnarmaður og formaður FsN (LL)

Gunnar Þorgeirsson, formaður BÍ (GÞ) -kom  á fund kl 12:00 – 13:00

Sigurkarl Stefánsson, formaður FsV (SS) -kom á fjarfund frá kl 12:30 – loka

Björn Bjarndal Jónsson, formaður FsS  (BBJ) -kom á fjarfund kl 12:45 – loka

Maríanna Jóhannsdóttir, formaður FsA (MA) -kom á fjarfund kl 12:45 – 14:30

Hlynur Gauti Sigurðsson, starfsmaður BÍ og ritari fundargerðar (HGS)

Naomi Bos, formaður FsVfj, kom ekki á fundinn.

Formaður opnaði fundinn og bauð fundargesti velkomna.

1)Í deiglunni

HGS segir frá:

a. Opinber skrif sjálfskipaðra verndara náttúrunnar ganga út á að rýra gildi skógræktar. Skógargeirinn hrekur þessar yfirlýsingar alla jafna með rökstuddum hæti. Mikilvægt er að slíku sé ekki látið ósvarað svo rangfærslur festist ekki í sessi.

b.  Reikna má með að innan fárra ári verði almenn krafa um staðfestingar á uppruna og ágæti íslensks viðar líkt og tíðkast hjá öðrum þjóðum. Slík vottun er kostnaðarsöm enn sem komið og er óaðlöguð íslensku lagaumhverfi. HGS, ásamt fleirum, vinnur í því að meta hvort innleiðing slíkrar alþjóðlegar staðfestingar sé tímabær hérlendis og hvernig væri best væri að innleiða þær.

c.   Væntingar skógarbænda, að Kolefnisbrúin verði að því verkfæri sem vænst var til, hafa dalað. Starfsmenn BÍ og formaður Kolefnisbrúar áttu nýverið góða fundi vegna fjármögnunarkosta svo enn er von.

d.  Bændablaðið er málgagn bænda. Skógarbændur ættu að nýta sé það betur og má benda á að nú er annatími í gróðursetningu. Hægt væri t.d. að senda fallegar myndir og/eða vera í sambandi við HGS ef upp koma hugmyndir að greinum. Það væri t.d. hægt að taka viðtal við skógarbændur og gætu formenn skógarbændafélaganna riðið á vaðið. Einnig gætu skógarbændur spurt hvort annan, tekið myndir og notað kannski fyrirframákveðnar spurningar. HGS var falið að koma hugmyndum áleiðis til ritstjórnar Bændablaðsins.

2)Taxtanefnd

HG segir frá:

Fundur taxtanefndar er fyrirhugaður á mánudaginn kemur. Sem fyrr voru framlög til skógræktar skorin niður til Skógræktarinnar. Umræður eru uppi að umbreytingu greiðslu-/hvatakerfis þar sem viðskipti með kolefniseiningar koma við sögu. Þessar breytingar myndu hafa áhrif á greiðslukerfi til skógræktar meðal bænda. Þörf er þó að ræða annars vegar greiðslur fyrir gerð skjólbelta og hins vegar samræmingu milli verktaka í gróðursetningu á vegum Skógræktarinnar og greiðslna til skógarbænda.

3)Formaður BÍ

Ætlunin var að hafa formenn skógarbændafélaga viðloðandi þennan umræðulið en vegna anna hjá GÞ þurfti að hliðra tilsettum tíma. Formenn komu inn á fundinn með fjarfundabúnaði einn af öðrum.

GÞ var boðinn velkominn inn á fundinn.

• GÞ segir frá samtali sem hann átti við skógræktarstjóra vegna asparframleiðslu Skógræktarinnar á Tumastöðum. Umræðan var tilkomin að frumkvæði garðyrkjubænda í skógarplöntuframleiðslu.

• Rætt var um að gera einblöðung fyrir skógarbændur um kosti þess að vera félagsmaður BÍ. Að sögn Guðrúnar Birnu, yfirmanns félagsmála BÍ, hafa 181 greitt félagsgjöld 2023 í deild skógarbænda. LL stingur upp á að skrifa öðru hvoru fréttabréf í formi tölvupósts með fréttum frá skógardeild BÍ.

• Rammasamning og búvörusamning bar á góma.

• Afgreiðsla á framkvæmdaleyfum til skógræktar virðist sífellt flóknari í afgreiðslu sveitarfélaga. Þörf er á úrbótum, nú sem aldrei fyrr. Hér eiga helst í hlut Skógræktin, BÍ, Samtök sveitarfélaga og landeigendur. GÞ segir frá góðri vinnu í skipulagsmálum hjá Rangárþingi ytra með landsvæði undir Motorcross-braut sem vert er að draga lærdóm af.

Í framhaldi af fyrri lið:

• Hvernig er hægt að koma því í gegn í íslenskum skipulagslögum að skógrækt sé skilgreind sem landbúnaður. GÞ leggur til að eftirfarandi beiðni verði beint til Vigdísar framkvæmdastjóra BÍ að fela nýráðnum lögfræðinema að finna út úr:  „Hvernig breytum við skógrækt í landbúnað?“.

• Skömmu fyrir fund hafði Björgvin Eggertsson, brautarstjóri Skógs og náttúru, Reykjum hjá Garðyrkjuskólanum/FSU, samband við HGS og bað um að koma orðsendingu inn á fundinn: Skriður er komin á vinnu Garðyrkjuskólans, meðal annars vegna tilkomu formanns BÍ. Unnið er að námskeiðum fyrir skógarbændur. Grænni skógar-námskeiðaröðin fer senn að hefjast aftur.

• Undirbúningur að framhaldsskýrslu „Horft fram á við“ er hafinn. Gera þarf kostnaðaráætlun.

• Þörf er á að hafa tölulegar upplýsingar skógræktar á reiðum höndum. Það er lykilatriði í árangursríkri hagsmunabaráttu. Æskilegt er að hafa hagfræðinga BÍ með í ráðum við úrvinnslu gagna. Upp komu atriði sem leitað verður svara við hjá Skógræktinni:

• Hver hafa fjárframlög ríkisins til bændaskógræktar verið til Skógræktarinnar/landshlutaverkefna frá hruni til dagsins í dag (eða lengur)?

• Hver hefur verið árleg gróðursetning skógarbænda og þjóðskóga, sundurliðað?

• Er biðlisti af jörðum þar sem vilji er til að hefja skógrækt hjá Skógræktinni? Hvað er hann langur og hvernig gengur að afgreiða umsóknir? Er gerður greinamunur á afgreiðslu á girtu/ógirtu landi?

• Væri hægt að skrá skógræktarjarðir í gagnagrunninn Jörð (jord.is)? Ef ekki, hvað kemur í veg fyrir það? Þar sem hér er velt upp tæknilegum möguleika er líklegt að henni skuli beint til kortasérfræðings Skógræktarinnar, Björn Traustasonar. Þessari spurningu má einnig beina til Borgars Páls hjá RML.

• Dræm nýliðun á bújörðum er orðin mikil ógn við landbúnað. Þessari þróun þarf að afstýra.

• Lausaganga búfjár þarfnast frekari úrvinnslu. JGJ veltir því upp hvort hægt væri að bjóða bændum, sem eiga eldri skóga, að bjóða sauðfjárbændum að opna skóga sína til beitar?

• Rætt var um Málþing skógarbænda sem fyrirhugað er í haust. GÞ var við upphaf umræðunnar.

Sjá næsta lið.

4)Málþing skógabænda

Fyrirhugað er að halda málþing og árshátíð skógarbænda á Varmalandi í Norðurárdal 14. október nk. Undirbúningshópur, skipaður HGS, GS og SS, fóru yfir stöðu mála. Búið er að bóka fundarstað og tilheyrandi. Upphaflega var ætlunin að hafa þrjú þemu: þ.e. mat, loftslagsmál og umhirðu, en samhljómur var um að hætta við þema loftslagsmála og hafa einungis tvö þemu. Úr þeirri umræðu kom hugmynd að kjörorðum rástefnunnar: „Hvernig geri ég skóginn minn arðbæran?“.

Nú þegar hefur verið rætt við ýmsa fyrirlesara en enginn hefur staðfest komu sína. Mikilvægt er að ganga frá fjármögnun áður en lengra er haldið. Ef fyrirlesari er fengin utan úr heim þarf að vega og meta kosti um að greiða fyrir hann til Íslands eða að fá hann til að flytja fyrirlestur með aðstoð tölvutækni, sé sá kostur í boði. BBJ bendir á sænska heimasíðu um mat og skóg; skogsskafferiet.se.

Ákveðið var að BBJ kæmi inn í undirbúningshóp málþingsins.

5)Önnur mál

Elisabeth Bernard, hjá skógræktarfélagi Íslands, hlaut ekki náð Matvælasjóðs fyrir styrkumsókn sinni en skógarbændur, í nafni BÍ, lögðu umsókninni stuðning. HGS mun funda með Elisabeth í komandi viku. Stjórnin vill veita henni stuðning en ekki fjárhagslegan.

BBJ telur að æskilegt sé að hætta að tala um búgreinadeildina undir nafni „SkógBÍ“ eins og títt er. Það var fínt vinnuheiti meðan var og hét en æskilegt er að mynda samtöðu með BÍ og kalla deildina frekar „skógardeild BÍ“ út á við eða búgreinadeild skógarbænda BÍ. „SkógBÍ“ fer fyrir brjóstið á fólki. BÍ eru heildarsamtök allra bænda.

HGS óskar eftir ábendingum um betrumbætur á heimasíðuna skogarbondi.is og vill fá að vita af öllum viðburðum og slíku til að auglýsa á síðunni.

MJ greinir frá að rætur garðyrkjuskólans teygja sig víða og ætti að nýta þær tengingar. Nefnir í því samhengi fyrrum starfsmann skólans, Jóns Kristófers Arnasonar, sem nú er garðyrkjustjóri Múlaþings. BBJ segir að mismunandi kostir eru til skoðunar hverju sinni.  

LL tiltekur mikilvægt mál af aðalfundi FSN sem var fyrir um viku síðan, þ.e. að gera megi enn betur í að tryggja fræframboð og plöntuframleiðslu, sér í lagi á lerki og þar með blendingnum hrym. Það megi gera með samstilltu átaki skógarbænda, BÍ, Skógræktarinnar og ríkisins í að koma á laggirnar nýju fræhúsi..

Næsti fundur er fyrirhugaður 21.júní 2023, kl 20:00 á TEAMS

 Fundi lauk kl. 15:00

​

​

FUNDARGERÐ búgreinardeildar skógarbænda í Bændasamtökum Íslands

24. stjórnarfundur skógardeildar BÍ    

TEAMS fjarfundur, miðvikudaginn 28. júní 2023 kl. 20:00

Fundarmenn:

Jóhann Gísli Jóhannsson, formaður (JGJ)  

Laufey Leifsdóttir, stjórnarmaður (LL)

Dagbjartur Bjarnason, stjórnarmaður (DB)

Guðmundur Sigurðsson, stjórnarmaður (GS)*

Björn Bjarndal Jónsson, varamaður í stjórn og formaður FsS  (BBJ)*

Sigurkarl Stefánsson, formaður FsV (SS)*

Hlynur Gauti Sigurðsson, starfsmaður BÍ og ritari fundargerðar (HGS)*

* Milli kl 19:30–20:00 fundaði undirbúningsnefnd Málþings skógarbænda. Stjórnarliðar komu einn af öðrum inn á þann fund og hófst formlegur stjórnarfundur á slaginu 20:00 með öllum fundarmönnum.

Formaður opnaði fundinn og bauð stjórnarliða Skógardeildar BÍ velkomna.

1)Málþing skógarbænda

Fyrirhugað er að halda Málþing skógarbænda að Varmalandi í Borgarfirði laugardaginn 14. október nk.

JGJ segir frá: Í gær sátu JGJ og HGS fund með Gunnari Þorgeirssyni, formanni BÍ, Vigdísi Häsler, framkvæmdastjóra BÍ og Örvari Þór Ólafssyni, gjaldkera BÍ, þar sem rædd var fjármögnun og hugmyndir að útfærslum málþings skógarbænda. Málþingið ber upp á sömu helgi og fyrirhugaður dagur landbúnaðarins. Samlegð er meðal viðburða og verða þeir samræmdir upp að einhverju marki, svo sem í auglýsingum. HGS, Vigdísi og Stellu Björk Helgadóttur, BÍ, er falið að útæra samræmingu eftir sumarfrí.

Þegar rætt var um fjármögnun miðaði áætlun upp á hálfa miljón króna sem fólst einkum í fjármögnun fyrirlesara. Örvari var falið að tryggja fjármagn.

Undirbúningshópurinn sagði frá hugmyndum sínum:

Viðburðir BÍ:         Ræddur var samnefnari dags landbúnaðarins og málþings skógarbænda. Þörf á að finna málþinginu viðeigandi titil.

Dagskrá:                 Sextán frambærilegir fyrirlesarar hafa tekið vel í að halda erindi á málþinginu. Hugmyndir voru uppi með að bjóða sænska skógarbóndanum Marianne Erikssen á málþingið en ákveðið var gera það ekki að þessu sinni. Mögulega verður sú umræða tekin upp aftur fyrir næsta málþing. Ákveðið var að undirbúningshópur lyki sinni undirbúningsvinnu með staðfestingar og útreikninga fyrir lok næstu viku og tilkynni stjórn og formönnum. Eftir sumarfrí tekur við vinna við framkvæmd málþingsins sjálfs, svo sem fjármögnun.

Aðbúnaður:          Flestir voru sammála því að aðsókn gæti orðið í betra lagi, þ.e. 60–80 manns. Ákveðið var að panta stærri salinn á Varmalandi. GS tekur að sér að ganga frá því.

Skráningargjald:   Hótelið býður kaffiveitingar og hádegismat á um 6000 krónur. Vilji var meðal stjórnar að hafa skráningargjald nærri 3000 krónum. Ræddir voru möguleikar til niðurgreiðslu og hvort umbuna ætti félagsmönnum BÍ sem mæta.

2)Önnur mál

HGS sagði frá að BÍ hefði óskað eftir málefnum sem deild skógarbænda er stolt af til frekari umfjöllunar. HGS lagði til vel heppnaðan bás á landbúnaðarsýningu og B) TreProX-verkefnið.

Næsti stjórnarfundur auglýstur eftir sumarfrí.

 Fundi lauk kl. 21:00

​

​

​

​

FUNDARGERÐ búgreinardeildar skógarbænda í Bændasamtökum Íslands

25. stjórnarfundur skógardeildar BÍ    

TEAMS fjarfundur, miðvikudaginn 9.ágúst 2023 kl. 20:00

Fundarmenn:

Hrönn Guðmundsdóttir, varaformaður (GS)

Laufey Leifsdóttir, stjórnarmaður (LL)

Dagbjartur Bjarnason, stjórnarmaður (DB)

Guðmundur Sigurðsson, stjórnarmaður (GS)

Maríanna Jóhansdóttir, varastjórnarmaður, fulltrúi af Austurlandi (MJ)

Jóhann Gísli Jóhannsson (JGJ), formaður búgreinadeildar skógarbænda, kom ekki á fundinn þar sem hann metur sig vanhæfan í fyrri fundarlið vegna aðkomu sinnar að Búnaðarsambandi Austurlands.  

Hlynur Gauti Sigurðsson, starfsmaður BÍ og ritari fundargerðar (HGS)

Varaformaður opnaði fundinn og bauð stjórnarliða búgreinadeildar skógarbænda BÍ velkomna til fundar.

1)Bréf BÍ um beitarmál

Bréf frá Bændasamtökum Íslands (BÍ), dagsett 6.júlí 2023, var sent til Sambands íslenskra sveitarfélaga og sveitarfélaga landsins. Í bréfinu var farið yfir helstu sjónarmið beitarmála með tilliti til laga í landinu. Undir bréfið skrifuðu formaður BÍ og framkvæmdastjóri BÍ.

Fundarmenn harma það að forsvarsmenn BÍ taki afstöðu til mála með hagsmuni einnar búgreinar fram yfir hagsmuni annarra. Ákveðið var að senda út yfirlýsingu til stjórnar BÍ um vanþóknun þessa bréfs.

HG tekur að sér að gera uppdrátt að bréfi og öðrum svo gefinn kostur á að laga eftir þörfum. Í kjölfarið er HGS falið að senda bréfið formlega til forystu BÍ.

2)NSF Rådsmöte 2023 

Þann 11.júlí sl. barst boð á árlega ráðstefnu FSN, Félag skógarbænda á Norðurlöndum, the Council meeting of Nordic Family Forestry – NSF Rådsmöte, undirritað af Magnus Kindbom og Mia Crawford. Ráðstefnan er nú haldin í Karlshamn og Mörrum í Suður Svíþjóð, dagana 14.-15.september. Undanfarin ár hefur HGS mætt fyrir hönd Landssamtaka skógareigenda og hafa samtökin kostað för hans, laun og uppihald. HGS kemst ekki að þessu sinni. Stjórnin óskaði eftir öðrum fulltrúa til að mæta á ráðstefnuna og bauð DB sig fram að því tilskildu að hann fengi að hafa frú sína með. Samþykkt var að DB og frú yrðu fulltrúar íslenskra skógarbænda á ráðstefnunni. Fyrirfram hafði JGJ lýst velþóknun sinni á það. Óskað verður eftir að DB skili skýrslu úr ferðinni og að hana megi birtingar í Bændablaðinu að öllu leiti, eða að hluta.

Ferðin yrði ferðalöngum að kostnaðarlausu. HGS falið að leita fjárframlags til BÍ.  

Kostnaður: Hótel fyrir einn er 1008SEK nóttin (12.500 kr). Ráðstefnugjald er 480 SEK (6000kr). Samgöngur á landi áætlað 10.000 kr á mann. Flug KEF-CPH-KEF áætlað 30.000 kr 

Samtals áætlaður kostnaður fyrir einn = 66.000 kr.

Samtals áætlaður kostnaður fyrir tvo = 150.00 kr

Ræddir voru kostir og gallar við þátttöku á fundinum:

1. Mynda tengslanet og efla samstarf. Mikilvægara nú en nokkru sinni. Ástæðan er alþjóðavæðing kolefnisviðskipta og breytt staða afurða hjá okkur á íslandi.

2. Dagskráin er áhugaverð og ber þar hæst SÖDRA verkefnið OnceMore, sem er endurnýting á textíl.

3. Þátttakendur á fundinum fá 10 mínútur til að kynna stöðu skógarækar heimafyrir. DB og HGS munu útbúa kynningu í sameiningu sem DB mun flytja á ráðstefnunni.

Næsti stjórnarfundur fyrirhugaður í september.

 Fundi lauk kl. 21:20

​

​

​

Bréf frá 1. lið

Sent á

Gunnar Þorgeirsson,

formann Bændasamtaka Íslands                                                                          Þorlákshöfn, 15. ágúst 2023

Efni:

Svar við bréfi BÍ vegna lausagöngu/ágangs búfjár sem sent var til sveitarfélaga þann 6. júlí síðastliðinn.

Stjórn búgreinadeildar skógarbænda hjá Bændasamtökum Íslands harmar að forsvarsmenn BÍ taki afstöðu til mála með hagsmuni einnar búgreinar fram yfir hagsmuni annarra. Ljóst er að viðtækt ósamkomulag er um hvernig túlka skuli lög og reglur um búfjárhald, lausagöngu, afréttarmál og fjallskil og víða gengur á með kærumálum.

Eðlilegra er að heildarsamtök bænda leggi sitt af mörkum til þess að farið verði í gagngera endurskoðun á þessum málaflokkum af hálfu ríkisins til að skýra leikreglur og tryggja að alls jafnræðis sé gætt. Bændur í öllum búgreinum þurfa að sitja við sama borð þegar kemur að nýtingu á eigin landi og full ástæða til að bændasamtökin vinni að því að bændur, sveitarstjórnir og landeigendur viti með óyggjandi hætti að hverju þeir ganga.

Ljóst er að á vettvangi Bændasamtaka Íslands þarf að taka sjónarmið skógarbænda til greina ef þeir eiga að geta litið á Bændasamtökin sem sín samtök.

Hrönn Guðmundsdóttir,

varaformaður búgreinadeildar skógarbænda, fulltrúi af Suðurlandi.

Laufey Leifsdóttir,

stjórnarmaður og fulltrúi á Norðurlandi.

Guðmundur Sigurðsson,

stjórnarmaður og fulltrúi á Vesturlandi.

Dagbjartur Bjarnason,

stjórnarmaður og fulltrúi á Vestfjörðum.

Maríanna Jóhannsdóttir,

varastjórnarmaður og fulltr

​

​

​

FUNDARGERÐ búgreinardeildar skógarbænda í Bændasamtökum Íslands

26. stjórnarfundur skógardeildar BÍ    

TEAMS fjarfundur, miðvikudaginn 6. sept. 2023 kl. 20:40

Fundarmenn:

Jóhann Gísli Jóhannsson, formaður (JGJ)  

Hrönn Guðmundsdóttir, varaformaður (HG)

Dagbjartur Bjarnason, stjórnarmaður (DB)

Guðmundur Sigurðsson, stjórnarmaður (GS)

Laufey Leifsdóttir, stjórnarmaður (LL)

Hlynur Gauti Sigurðsson, starfsmaður BÍ og ritari fundargerðar (HGS)

Formaður opnaði fundinn og bauð stjórnarliða skógardeildar BÍ velkomna.

1)Erindin til BÍ

Á síðasta fundi (25. stjórnarfundur frá 9. ágúst) voru tvö erindi til umræðu en báðum var beint til stjórnar BÍ. Annað fjallaði um ágangsfé og hitt um fjármögnun á NFS-ráðstefnu. Fundarmenn harma að erindum deildarinnar hafi ekki verið svarað fyrir þennan fund.

2)Skoðanakönnun / þarfagreining

Alls skilgreinir 181 félagsmaður sig sem sem skógarbónda hjá BÍ. Það er örlítil fækkun frá í vor. Rætt var um hvað þyrfti að gera til efla starfið. Ætla má að félagar í skógarbændafélögum séu yfir 600 ef miðað er við síðasta félagatal Landssamtaka skógareigenda (2021). Hvernig ætti stefna búgreinadeildarinnar að vera? Hvað þykir fólki um stjórn búgreinadeildar skógarbænda? Hvað þykir skógarbænum um lausagöngu? Hvað þykir fólki með nýja stofnun skógræktar? Hvernig vilja bændur sinna umhirðu sinna skóga og mögulegrar sölu afurða? Ágætt væri að leita hugmynda til sviðstjóra Skógræktarinnar. Könnunin yrði að vera lokuð og eingöngu fyrir félaga í skógarbændafélögum og búgreinadeildinni. Gott væri að hafa niðurstöður úr könnuninni fyrir komandi Búgreinaþing 2024.

3)NSF Rådsmöte

Í næstu viku mun DB og frú fara til Svíþjóðar og vera íslenskir fulltrúar skógarbænda á fundi systrafélaga í Skandinavíu. HGS og DB hafa undirbúið erindi inn á fundinn sem DB mun fá að flytja á 10 mínútum. Farið var yfir erindi sem DB og HGS hafa grófunnið. HG og LL ætla leggja lið við að bæta erindið.   

4)Málþing skógarbænda

Undirbúningur gengur vel við málþingið. Komin er út auglýsing í Bændablaðinu. Tölvupóstar hafa verið sendir á félaga. Í hringferð Bændasamtakanna síðustu daga kom formaður BÍ í flestum tilfellum inn á viðburðinn í tengslum við Dag landbúnaðarins. Vinna stendur nú yfir við að afla styrkja sem FSV mun halda utan um.

5)Samráðsfundur með Skógræktinni

Senn líður að því að kunngjört verður hver verður næsti yfirmaður skógaræktar í landinu þegar ráðinn verður forstöðumaður stofnunarinnar Land og Skógur. Undirbúa þarf samráðsfund vel og mikilvægt að rödd skógarbænda verði sterk innan nýrrar stofnunar. Fundurinn hefur enn ekki verið boðaður en reikna má með að hann verði í nóvember.

6)Í deiglunni

HGS sagði frá:

Hvatningarverðlaun skógræktar

Í verkefnalýsingu segir:

Hvatningaverðlaun skógræktar eru veitt til einstaklinga, hópa eða stofnana sem unnið hafa óeigingjarnt starf í þágu skógræktar á Íslandi. Að verðlaunum standa Skógræktarfélag Íslands, Skógræktin og Bændasamtök Íslands - skógarbændur. Sérstök nefnd fer yfir tilnefningar og velur verðlaunahafa hvers árs.

Undirbúningur verkefnis gengur vel og er fyrirhugað að veita verðlaun á Alþjóðadegi skóga í mars.

Iðnaðarsýning

Fjallað er um Iðnaðarsýninguna frá síðustu helgi í nýjasta Bændablaði. Þar komu skógarbændur að málum á sýningarsvæði með HMS undir samhentum orðum skógræktenda í landinu „Íslenskt timbur, já takk!“.

Fagnefnd Garðyrkjuskólans

Fundur í Fagnefnd Garðyrkjuskólans var haldinn 24. ágúst sl. með 18 þátttakendum. Rætt var um tengingar skólans við fagið og lagst yfir grundvallarspurninguna: Hvað viljum við að útskrifaður nemandi frá skólanum kunni? Boð verður í skólann 30.- okt. – 3. nóv. þar sem t.d. stjórn Skóg-BÍ fær að ræða við nemendur og skoða aðstöðu.

Næsti stjórnarfundur er fyrirhugaður kl 20:00 miðvikudaginn 4. október á TEMAS.

 Fundi lauk kl. 22:00

​​

​

​

FUNDARGERÐ búgreinardeildar skógarbænda í Bændasamtökum Íslands

27. stjórnarfundur skógardeildar BÍ    

TEAMS fjarfundur, miðvikudaginn 4. október. 2023 kl. 20:00

Fundarmenn:

Jóhann Gísli Jóhannsson, formaður (JGJ)  

Hrönn Guðmundsdóttir, varaformaður (HG)

Dagbjartur Bjarnason, stjórnarmaður (DB)

Guðmundur Sigurðsson, stjórnarmaður (GS)

Laufey Leifsdóttir, stjórnarmaður (LL)

Hlynur Gauti Sigurðsson, starfsmaður BÍ og ritari fundargerðar (HGS)

1)NFS

Ráðstefnan

DB sagði frá för þeirra hjóna á NSF Rådsmötte 2023 í Karlshamn/Mörrum í Svíþjóð (NFS  stendur fyrir samtök skógarbænda á Norðurlöndum). Á fyrri degi ráðstefnunnar  fór fulltrúi hvers lands með annál frá sínu landi þar sem sagt var frá breytingum og áskorunum. Þátttakendur voru uppteknir af Evrópusambandinu sem sífellt veldur vonbrigðum. Síðari dagurinn fór fram í verksmiðju SÖDRA sem er samvinnufélag skógarbænda í Suður-Svíþjóð með 52.000 félagsmenn og 3.000 starfsmenn. Í verksmiðjunni fer fram mikil nýsköpun en það sem ber af um þessar mundir er framleiðsla á líf-eldsneyti og textílgerð úr trjám.  Eldsneytið er meðal annars búið til úr laufblöðum og textílklæði er unnið að 20% úr aflögðu bómullarefni frá þvottahúsum og að 80% úr viði. DB mun flytja erindi um ferðina á komandi málþingi skógarbænda 14. október nk.

Íslensk NFS-aðild

Þátttakendur ráðstefnunnar sýndu Íslandi mikinn áhuga og vildu efla samstarf milli landanna.  

Í gær barst DB og HGS póstur frá Marko Mäki-Hakola, sitjandi formanni NFS þar hann hafði gróflega séð skipt verkefnum og fundum niður á árgrundvelli og gaf okkur hugmynd að mögulegu árgjaldi fyrir íslenskri aðild okkar, sem var 1000 evrur eða 150.000 krónur íslenskar að núvirði.

Stjórnin tók vel í þá hugmynd að vera aðilar að NFS og taldi engan vafa leika á að slík samtök gætu gagnast skógrækt á Íslandi vel. Ekki verður tekin ákvörðun um inngöngu á þessum fundi því enn á eftir að svara mögrum spurningum.  

2)Málþing, staðan góð

GS og HGS sögðu frá: Undirbúningur málþings gengur vel. Nú þegar eru skráðir 75 á árshátíðina og 86 eru skráðir á málþingið. Þó er rúm vika í viðburðinn og mögulega munu fleiri bætast við.

3)Svar BÍ um ágangsfé

Þann 29. September bast HGS eftirfarandi orðsending frá framkvæmdastjóra BÍ.

Sæll Hlynur.   Vísað er til erindis frá búgreinadeild skógarbænda hjá BÍ, dags. 15. Ágúst sl., sem beint var til stjórnar Bændasamtakanna. Vegna anna hjá stjórn komst erindið ekki á dagskrá fyrr en á stjórnarfundi sem haldinn var þann 19. September sl.

Á fundi sem stjórnir deilda skógar- og sauðfjárbænda áttu saman í kjölfar búgreinaþings, var ákveðið að Bændasamtökin myndu draga saman minnisblað um álitaefnið sem snýr að lausagöngu búfjár. Fjórir lögfræðingar BÍ, þar á meðal framkvæmdastjóri Bændasamtakanna unnu að gerð minnisblaðsins sem sent var á sveitarfélögin. Tilgangur minnisblaðsins var einvörðungu að skýra gildandi rétt og framkvæmd.  Þess skal einnig getið að snemma á árinu áttu fulltrúar Bændasamtakanna fund með dómsmálaráðuneytinu þar sem óskað var eftir aðkomu innviðaráðuneytisins, matvælaráðuneytisins og Sambands íslenskra sveitarfélaga að málinu en tilefni fundarins kom í kjölfar álits dómsmálaráðuneytisins. Engar fregnir aðrar höfum við frekar af málinu af hálfu stjórnsýslunnar. Mikilvægt er fyrir allar búgreinar að skipulagsmál verði tekin fastari tökum af hálfu sveitarfélaga en verið hefur hingað til.         Kv.Vigdís

Samhljóma álit stjórnar var að svarið skýrði ekki þá óvissustöðu sem uppi væri eða bætti við umræðuna.

4)Búnaðarþing/Búgreinarþing

Skógarbændur lýsa áhyggjum sínum af því að með því að slá saman búgreinaþingi og búnaðarþingi gefist ekki nægur tími til að sinna mikilvægri málefnavinnu og undirbúa tillögur fyrir búgreinaþing. Þetta fyrirkomulag hentar ekki þeirri virkni sem er í félögum bænda á landsvísu og leiðir til þess að sífellt færri muni taka þátt í nauðsynlegum félagsstörfum. 

LL tekur að sér senda  svar á Hilmar Vilbergsson, lögfræðing BÍ.

5)Samráðsfundur

Í ljósi samruna Skógræktarinnar og Landgræðslunnar í Land og Skóg er tillaga þess efnis að næsti fundur verði fyrst og fremst upplýsingafundur þar sem báðir aðilar segja frá helstu verkefnum sínum.

HGS falið að vera í sambandi við Hrefnu Jóhannesdóttur hjá Skógræktinni.

6)Jólatré

Stjórnin ræddi stöðuna á jólatrjáasölu innan og milli landshluta. SkógBÍ vill hvetja bændur til að velja trén vel og var HGS falið að gera fróðleik um jólatré skil á skogarbondi.is.

7)Skoðanakönnun

HGS er falið að setja saman grunnhugmynd að skoðanakönnun og er vísað til bókunar frá 26. fundi stjórnar. Gott væri að könnunin færi í loftið skömmu eftir áramót.

8)Markaðstorg afurða

Í framhaldi af fyrri lið um skoðanakönnun. Ef þátttaka í skoðanakönnuninni er viðunandi væri gott að vinna frekar í einhvers konar útfærslu á markaðstorgi fyrir viðarafurðir. Þar mætti tengja ýmsa hagsmunaaðila saman líkt og gert var á iðnaðar- og landbúnaðarsýningum.

9)Önnur mál

Búvörusamningar

Búvörusamningar voru ræddir og mikilvægi þess að nota bestu fáanlegu upplýsingar um skjólbeltarækt í þeim viðræðum og tryggja fræðslu um gagnsemi skjólbelta til bænda

​

Næsti stjórnarfundur er fyrirhugaður kl. 20:00, miðvikudaginn 2. nóvember

ásamt formönnum skógarbændafélaganna á TEAMS

 Fundi lauk kl. 22:00

​

​

FUNDARGERÐ búgreinardeildar skógarbænda í Bændasamtökum Íslands

28. stjórnarfundur skógardeildar BÍ    

TEAMS fjarfundur, mánudagurinn 23. október. 2023 kl. 20:00

Fundarmenn:

Hrönn Guðmundsdóttir, varaformaður (HG)

Dagbjartur Bjarnason, stjórnarmaður (DB)

Guðmundur Sigurðsson, stjórnarmaður (GS)

Laufey Leifsdóttir, stjórnarmaður og formaður FsN (LL)

Guðmundur Sigurðsson, stjórnarmaður, kom seint inn á fund (GS)

Björn Bjarndal Jónsson, formaður FsS (BBJ)

Marianna Jóhannsdóttir, formaður FsA (MJ)

Naomi Bos , formaður FsVfj. (NB)

Sigurkarl Stefánsson, formaður fsV (SS)

Þorvaldur Birgir Arnason, starfsmaður BÍ og einn skýrsluhöfunda í lið nr. 5 (ÞBA)

Hlynur Gauti Sigurðsson, starfsmaður BÍ og ritari fundargerðar (HGS)

Jóhann Gísli Jóhannsson, formaður, var fjarverandi vegna veikinda (JGJ)

1)Síðasti samráðsfundur SkógBÍ og Skógræktarinnar

Lagt var til að halda síðasta samráðsfund SkógBÍ og Skógræktarinnar, áður en ný stofnun, Land og skógur, verður til. Fundurinn verði  á TEAMS og tímasettur í 47. viku ársins eða 20.-23. nóvember. HGS er falið að biðja Hrefnu Jóhannesdóttur hjá Skógræktinni að ákveða tímasetninguna frekar.

HG ætlar að kalla taxtanefndina saman áður en kemur að samráðsfundi.

2)Gengið um Garðyrkjuskólann

Áður hafði Guðríður Helgadóttir, í nafni Garðyrkjuskólans, boðið forystu SkógBÍ að mæta á opinn fund í Garðyrkjuskólann ásamt nemendum skólans. Dagsetning yrði væntanlega um komandi mánaðamót. Stjórnarmenn lýstu áhuga á að mæta. HGS ætlar að senda út boð á fundarmenn er frekari fregnir berast.

3)Fulltrúa stjórnar á aukabúnaðarþing 14. nóv.

Boðað hefur verið til aukabúnaðarþings 14. nóvember nk. og verður hann haldinn milli kl. 10:00-12:00 á TEAMS. Síðast voru JGJ og HG skipaður fulltrúar fyrir skógarbændur. JGJ kemst ekki nú og er því lagt til að HG og LL verði fulltrúar fyrir hönd skógarbænda fáist það samþykkt af kjördeild þingsins.

4)Árshátíð og málþing á Varmalandi 

Í frétt á skogarbondi.is má nálgast fyrirlestra og upptökur, ásamt öðrum fróðleik af nýafstöðnu málþingi skógarbænda á Varmalandi. Uppgjör stendur enn yfir. Allir tóku undir að vel hafi tekist til og áhugi var á að huga að undirbúningi þess næsta. HGS sagðist ætla gera málþinginu skil í Bændablaðinu.

5)„Landbúnaður er lausnin“

Nú standa yfir skrif á skýrslu sem ber nafnið „Landbúnaður er lausnin – Aðgerðaráætlun landbúnaðarins

í loftslagsmálum til 2030“. Fyrir fundinn gafst fundarmönnum að lesa yfir drög skýrslunnar og höfðu LL og DB skilað inn athugasemdum. Inn á fundinn kom ÞBA til að ræða skýrsludrögin og leita viðbragða. Fundarmönnum þótti innihald skýrslunnar gott, fögnuðu frumkvæðinu og gáfu uppbyggilegar athugasemdir.

6)Önnur mál

Fundargerðir

Fyrir fundinn sendi HGS fundarmönnum allar fundargerði SkógBÍ frá árinu. BBJ var ánægður með frumkvæðið og taldi að 5 sinnum hafðu girðingar og sauðfé verið til umræðu. Hann hefði viljað sjá frekari umræðu um tryggingarmál og Kolefnisbrú. Samstaða var um hans orð.

Girðingar og sauðfé

MJ lýsti yfir vonbrigðum með málalyktir á lausagöngubréfi BÍ fyrr í sumar og hefði viljað sjá afdráttarlausa niðurstöðu málsins en ekki þöggun eins og virðist eiga að vera. LL vill meina að lausagöngumálin varði aðrar búgreinar en skógarbændur og sauðfjárbændur  fundargestir voru sammála um að ræða þyrfti þessi mál á vettvangi annarra búgreina, svo sem nautagripabænda og garðyrkjubænda. Einnig er spurning hvort leita þyrfti til annarra hagsmunaaðila svo sem annarra landeigenda, sumarhúsaeigenda, Vegagerðarinnar og ferðaþjónustunnar. Einnig var rætt um að full ástæða væri þess að hvetja til jákvæðrar umfjöllunar, t.d. í Bændablaðinu, um sauðfé, skóga og beit, t.d. með því að segja frá góðum árangri Fljótsdælinga í samtvinningu beitar í skógi, samanber fyrirlestur Jóhanns Þórhallssonar á síðastliðnu málþingi.

Dagsetning næsta fundar var ekki rædd.

 Fundi lauk kl. 21:20

​

​

​

​

FUNDARGERÐ búgreinardeildar skógarbænda í Bændasamtökum Íslands

29. stjórnarfundur skógardeildar BÍ    

TEAMS fjarfundur, Þriðjudagskvöldið 19. desember 2023 kl. 20:00

Fundarmenn:

Jóhann Gísli Jóhannsson, formaður, (JGJ)

Hrönn Guðmundsdóttir, varaformaður (HG)

Dagbjartur Bjarnason, stjórnarmaður (DB)

Guðmundur Sigurðsson, stjórnarmaður (GS)

Laufey Leifsdóttir, stjórnarmaður og formaður FsN (LL)

Hlynur Gauti Sigurðsson, starfsmaður BÍ og ritari fundargerðar (HGS)

1)Í deiglunni

NFS Rådsmöte

Í nýjasta Bændablaði er grein um ferð Dagbjarts og Guðrúnar á NFS Rådsmöte í Svíþjóð.

Kolefnisbrú       

Fyrsti fundur verður í fyrramálið.

Fagráðstefnan 20.-21.mars á Akureyri

„Skógarauðlindin- Innviðir og skipulag“ verða kjörorð ráðstefnunnar sem nú verður haldin á Akureyri.

Tryggingamál

HGS ræddi við lögfræðinga BÍ og Björn Bjarndal um Náttúruhamfaratrygging Íslands. Því var vel tekið.

2)Síðasti samráðsfundur SkógBÍ og Skógræktarinnar

Fundarmenn fóru yfir helstu mál sem tekin voru fyrir á Samráðsfundi við Skógræktina sem var 5.des sl.. Pétur Halldórsson, starfsmaður Skógræktarinnar, tók punkta og hefur skilað til fundarmanna.

• Fundurinn þótti venjulegur.

• Reikna má með að sameining Skógræktarinnar og Landgræðslunnar taki tvö ár. -Ekki var umræða með að bjóða fjárhagsaðstoð til bænda sem vilja hefja framleiðslu kolefniseininga (Breska leiðin).

• Starf við innleiðingu á FSC vottun (upprunavottun) er hafin hjá Skógræktinni. Því er fagnað en áhugavert að Skógræktin hafi ekki viljað samstarf við skógarbændur.

• Innleiðing á CE vottun verður að öllum líkindum á komandi ári, sem er samstarf skógargeirans.

• Taka þarf umræðu með hverjir eru raunverulega í forsvari skógarbænda á landinu. Þar er bent á dræma aðild skógarbænda í Bændasamtökin.

• Samhljómur var með að efla samstarf Land og Skóg og skógarbænda á komandi ári. Hrefna Jóhannesdóttir sendi út tölvupóst með tillögum að fyrirkomulagi þess í kjölfar fundar. Samkvæmt tillögu Hrefnu yrði næsti samráðfundur á dagskrá um mánaðamótin janúar/febrúar.

3)Skoðanakönnun

Nýlega hóf HGS vinnu við skoðanakönnun. Spurningarnar eru unnar á Google docs og hafa allir fundarmenn fengið hlekk á undirbúningsskjalið. Þá geta fundarmenn haft beina aðkomu að gerð könnunarinnar.  HGS falið að senda hlekkinn á formenn skógarbændafélaganna ásamt bréfi því til útskýringar. Óska skal eftir viðbrögðum formanna fyrir 5. janúar 2024. Meðal annars þarf að vanda vel spurningu um tilvist skógarbænda innan BÍ og jafnvel að leita til forystu BÍ með þau mál ef vilji er fyrir því.

4)Land og skóg

HGS er falið að leita staðarfundar með Ágústi Sigurðssyni, forstöðumanni Land og skóg, helst fimmtudaginn 18. Janúar.

5)Deildarfundir búgreina

Á sama tíma í fyrra var þessi samkoma kölluð Búgreinaþing. Á auka búgreinarþingi í haust var nafninu breytt og heitir nú skv. samþykktum Deildarfundir búgreina. Það er mikill missir af orðinu -þing. Virðulegra hefði verið að kalla samkomuna „Deildarþing búgreina“ en svo fór sem fór. Samkoman verður haldin á hótel Berjaya þann 13.febrúar nk..

Fulltrúar

Fulltrúar skógarbænda á fundinum mega vera 25 talsins. Skógarbændur á Suðurlandi hafa tilnefnt sína fulltrúa. Hin félögin munu gera það eitt af öðru og hafa það klárt í síðasta lagi um miðjan næsta mánuð.

Skipa í kjörbréfanefnd.

Félagatal verður kunngert 10.janúar. Skipa þarf kjörbréfanefnd til að fara yfir félagatal og sjá um kosningar.

Eiga skógarbændur erindi í BÍ?

Reikna má með umræðu á samkomunni um stöðu deildar skógarbænda innan BÍ. Eru félaggjöldin of há? Er umræðan um lausagöngu í lamasessi? Þarf átak í málum kolefnisbindingar í skógum? Leita þarf leiða til að svara þessum spurningum og fleirum. Það má gera með skoðanakönnun sem lögðu skal út í janúar.

Tillögur

Skógarbændafélögum eru beðin að koma með tillögur tímanlega svo stjórn deildarinnar geti fundað um þær á næsta stjórnarfundi. Einnig ef ætlunin er að koma tillögum inn í skoðanakönnunina en enn óákveðið hvenær hún verður opnuð.

Ljóst er að gera þarf breytingar á Samþykktum deildarinnar á grunni breytinga frá Auka-Búnaðaþingi.

Umræðan í kjölfarið fór í dagsetninga og þorrablót vítt og breytt um landið.

6)Fulltrúi BÍ í dómnefnd Hvatningaverðlauna í skógrækt

Stjórnin felur HGS að sitja fyrir hönd Skógarbændadeildar BÍ í dómnefnd Hvatningaverlauna skógræktar.

7)Málþing 2024

Almenn ánægja stjórnarmanna var með fyrirkomulag að undirbúningi málþingsins að Varmalandi í október síðast liðinn þar sem fjögurra fulltrúa undirbúningsnefnd var skipuð starfmanni BÍ, stjórnarmanns búgreina­deildarinnar af viðkomandi landshluta, fulltrúa fyrir hönd allra skógarbændafélaga og fulltrúa úr stjórn þess skógarbændafélags sem heldur málþingið. HGS var falið heyra í formanni félags skógarbænda á Vestfjörðum varðandi næstu skref.

Frekari umræða um undirbúning þingsins er á dagskrá fyrir næsta stjórnarfund.

8)Önnur mál

Bændablaðið

HGS hvatti til frekari skrifa í þau bændablöð sem eru í aðdraganda deildarfunda (11. og 25. Janúar og 25. og 8. Febrúar). Einnig var rætt upplagt tækifæri fyrir fráfarandi formann að skrifa í blaðið.                       

Video frá Lennart

HGS sagði fundarmönnum frá nýlegum og áhugaverðum myndböndum á Youtube-síður Skógræktarinnar. Sér í lagi það sem snýr að Lennart Ackzell.

Næsti fundur staðafundur er fyrirhugaður fimmtudagurinn 18.jan (eða 8.janúar) í Borgartúni

 Fundi lauk kl. 21:45